BIG Alert: ఇంటర్నేషనల్ కాల్స్ తో జాగ్రత్తగా ఉండండి.. టెలికాం యూజర్లకు కేంద్రం హెచ్చరిక..!
దిశ, వెబ్‌డెస్క్: దేశంలో ఇటీవల కాలంలో సైబర్ మోసాలు(Cyber Frauds) రోజురోజుకి పెరుగుతున్న విషయం తెలిసిందే. సైబర్ నేరగాళ్లు(Cyber Criminals) తాము ప్రభుత్వ అధికారులమంటూ డిజిటల్ అరెస్ట్(Digital Arrest) పేరుతో సామాన్యులను బెదిరించి భారీ మొత్తంలో డబ్బును కాజేస్తున్నారు. డిజిటల్ అరెస్ట్ కేసులు రోజుకోటి వెలుగులోకి వస్తున్నాయి. ఈ నేపథ్యంలో కేంద్ర ప్రభుత్వం(Central Govt) అలర్ట్ అయ్యింది. సైబర్ మోసాలు పెరుగుతున్న కారణంగా టెలికాం యూజర్లకు హెచ్చరికలు జారీ చేసింది. గుర్తు తెలియని నంబర్ల నుంచి కాల్స్ లేదా మెసేజులు వస్తే స్పందించొద్దని తెలిపింది.
ముఖ్యంగా +8, +85, +65 వంటి ఇంటర్నేషనల్ నంబర్ల నుంచి కాల్స్ వస్తే జాగ్రత్తగా ఉండాలని సూచించింది. ఈ నంబర్ల నుంచి కాల్స్ చేసి తాము గవర్నమెంట్ ఆఫీసర్లమంటూ బెదిరించి మనీ నొక్కేస్తున్నారని, అలాంటి కాల్స్ వస్తే వెంటనే సంచార్ సాతి వెబ్‌సైట్ https://sancharsaathi.gov.in/లోని 'ఛక్షు(Chakshu)' ద్వారా ఫిర్యాదు చేయాలని సూచించింది. టెలికాం కంపెనీలు కూడా స్పామ్ కాల్స్, ఇంటర్నేషనల్ కాల్ అని సూచించేల యూజర్లకు అవగాహనా కల్పించాలని పేర్కొంది. ఈ మేరకు డిపార్ట్మెంట్ ఆఫ్ టెలికమ్యూనికేషన్(DOT) మంగళవారం అధికారిక ప్రకటన విడుదల చేసింది. సైబర్ నేరాలను అరికట్టేందుకు టాస్క్ ఫోర్స్ ఏర్పాటు చేశామని డాట్ తెలిపింది.
